Sunday, October 25, 2009

Karsada, livelihood project gitugyan ngadtos barangay

DAKO ang gibating kalipay sa taga Brgy. De-Asis, Curvada ug Poblacion sa Kapatagan, Lanao del Norte sa mga proyektong livelihood ug farm-to-market road nga gipadangat sa Mindanao North Coast Integrated Area Development Project (MNCIADP) ning nasangpit nga mga barangay.

Sa turnover ceremony nga gihimo sa barangay hall sa De-Asis niadtong Oktobre 1, gipadayag sa mga lider sa tulo ka barangay ang ilang kinasing-kasing nga pasalamat ngadto ni Mayor Benjie Baguio kinsa walay hunong nga naningkamot aron pagtubag sa mga nag-unang suliran sa katawhan ning lungsod.

Ang nasangpit nga mga proyekto naglangkob sa pag-rehab sa 2.5 kilometro karsada nga nagdugtong ning kahumayang mga barangay. Aduna kini tibuok kantidad nga P3.250-milyon, 80% (P2.275-m) niini ang gitubag sa MNCIADP samtang ang 20% (P975,000) gitubag sa lungsod isip counterpart.

Ang livelihood project naglangkob usab sa pagpamuhi’g bebe alang sa pagprodukto’g mga itlog. Gilaumang pinaagi niini, makabaton og dugang panginabuhian ang katawhan dinhi gawas sa naandang pagpanguma.

Ang MNCIADP usa ka espesyal nga programa sa Department of Agriculture (DA).
Atol sa maong seremonyas, mahinangpong gidawat ni Mayor Baguio ang simbolikong yawe nga nagtimaan sa mga proyekto uban sa panaad nga ampingan kini sa lungsod. Ang maong yawe gitunol ni Ms. Carlota Madriaga, and DA-10 Regional Coordinator sa MNCIADP.

Gikan ni Mayor Baguio, gisangon ang simbolikong yawe ngadto nila Barangay Captain Virginia Pueblos, Evangeline Labastilla ug Barangay Kagawad Dodong Guylan, kinsa mao mi-representar ni Capt. Barry Baguio.

Sa ilang pakigpulong, ilang gipadayag unsa kalisod ang maong dalan sa wala pa ang tabang sa MNCIADP. Matud nila nga kining maong dalan hilabihan ka lapok panahon sa ting-ulan, maglisuo og agi ang mga sakyanan ilabina ang mga estudyante.
Tungod niini, mahal ang bayad sa mga sakyanan nga mag-agian dinhi, matud sa mga opsiyal sa mga barangay.

Sa ilang pakigpulong ilang giawhag ang katawhan nga ampingan ang maong proyekto aron molungtad ug mapahimoslan sa kadaghanan.

Gipasalamatan usab ni Mayor Benjie si DA-10 Regional Executive Director Lealyn Ramos ug Ms. Madriaga sa ilang walay puas nga tabang sa taga Kapatagan.

Ang kalampusan usab sa maong mga proyekto nahimong posible sa paningkamot nila Municipal Agriculturist Frank Bihod, Municipal Engineer Jerick Orlanes ug Municipal Planning and Development Coordinator Gilbert Eya.(With reports from Joy C. Pepito)

No comments:

Post a Comment