Thursday, November 26, 2009

Unsay Kalainan? (aka Ampatuan Massacre)

Si Brando, iladong irihis ug bandido sa among lugar. Daghan na siyag gitulis, daghan na pod siyag gipatay.

Tungod sa iyang kaisog, saludo kaniya ang tanang isog sa among baryo gawas ni Waway, ang siga usab sa pikas barangay. Hilabihan gyod ang iyang kasuko niining Waway kay gawas nga dili kini motahod kaniya, iyang nahibaw-an nga nagplano usab kining motabok sa among baryong iyang gihawakan.

Busa, gitapok ni Brando ang tanan niyang bata-bata ug gimandoang buhaton ang tanan aron dili makasulod si Waway sa among baryo. Usa ka adlaw niana, samtang nagbantay ang mga sinugo ni Brando, ilang nakita ang grupo ni Waway nga nagpadulong sa among baryo. Mitaho dayon ang lider sa nagbantay ngadto kang Brando nga nagsingabot silang Waway. "Patya sila!" maoy singka ni Brando. "Pero naa silay kuyog mga magbabalak ug manunulat," maoy reklamo sa bantay. "Wa koy labot kanila! Patya silang tanan!" maoy subling singka ni Brando. "Apan bos, basin magabaan ta," dugang pangatarongan sa bantay. "Unsay magabaan? Ako ang diyos niining lugara!" maoy singka ni Brando nga sa iyang kasuko halos molugwa iyang mga mata.

Pagkaduol sa grupo ni Waway, gipaarakan dayon sa grupo ni Brando ang grupo nilang Waway. Way nahibiling buhi. Bisan ang mga iring nga naatlang miagi sa lugar nahitaboan, patay usab! Singkwenta y syete tanan ang patay way labot sa mga iring nga gidaginot sa mga bata-bata ni Brando.

Si Berta mao ang amo ni Brando. Buotan siya tan-awon, perminting puti nga tila ang iyang suoton.Bisan asa siya moadto tinahod bisan unsa nga dagkong grupo. Apan pareha ra silag taras ni Brando apan kini si Berta mas pino. Dili siya ganahan sa estilo ni Brando. Ingon pa niya kaniadto lud-on siya magtan-aw kon daghan ang patay sa iyang atubangan. "Alergic kog daghang dugo. Usa ka taro, ok na kanako," maoy pahimangno ni Berta sa iyang sinugo.

Tungod niini, pino pod molihok iyang mga tawo, morag di makabuak og baso. Basta naay moaksyog sukol sa ilang mga tawo,aw patay. Pero lagi, dili dinaghan. Ginagmay lang kay lagi si Berta lud-anon man.

Karon nga tigulang na si Berta, iyang gisugo iyang tawo sa pagkwenta. "Pila na ang imong napatay dong?" "Tresentos singkwenta y syete pa ma'am, apil mga magbabalak ug manunulat. Walay labot ana mga iring, iro ug mga manok nga miagi sa lugar nahitaboan ma'am." "Three hundred fifty seven, you mean?" maoy kompirma ni Berta. "Yes ma'am I mean," mao poy tubag sa iyang tawo.

"Good!"

5 comments:

  1. tinood jud na mars,mao nang walay asenso atong nasud

    ReplyDelete
  2. mas grabe c berta mars kay nag pa aron ingnon nga limpyo pero mas baho pa sa basura nga gelangaw...

    ReplyDelete
  3. Naa koy nailhan nga irihis kaayong dako. Way sama ka tampalasan pero rayna man man siya. Unya mura siya'g si Berta pero putot lang. Taason man si Berta, di ba? Ambot lang!

    ReplyDelete
  4. This comment has been removed by the author.

    ReplyDelete
  5. taas syag garbo apan mubo syag lawas.

    ReplyDelete