Ang Panguil Bay giila nga usa sa pinakabahandianon nga tinubdan sa isda, kinhason, alimango, ulang, mga nagkadaiyang tanom sa dagat ug daghan pang uban.
Nabuhi gikan sa iyang kamanggihatagon ang liboan ka mga lumulopyo sa tulo ka probinsiya sa Lanao del Norte, Misamis Occidental ug Zamboanga del Sur. Partikular nga nakapahimulos (ug tingale midaot usab niya) ang mga lungsod sa Tambulig, Bonifacio, Clarin, Aurora, Tangub City, Ozamiz City, Maigo,
Kolambugan, Tubod, Baroy, Kapatagan ug Lala.
APan niadtong 1990 nahaapil ang Panguil Bay sa listahan sa nag-unang 12 ka pinakanamiligrong katubigan sa tibuok kapopod-an (FSP, 1991). Matud sa mga banggiitan, wala makatabang sa pagsulbad sa padayong kadaot sa Panguil Bay ang pag-iyahay sa mga lungsod ug probinsiya diha sa pag-atubang sa mga problema sa iligal nga panagat ug pagguba sa mga mangrove.
Natukod unta tong Panguil Bay Development Council (PBDC) niadtong 1988 nga gilangkoban sa nasangpit nga mga probinsiya ug tagsa nila ka rehiyon. Apan namingaw ra usab kini niadtong 2001 human wala makakuha og Executive Order (EO) gikan sa Malakanyang aron unta bendisyonan ang iyang pagtunhay.
Busa nagsugyot ang mga banggiitan nga dili nalang unta magpahikot sa EO sa Malakanyang. Ang iyang katahom ug kamanggihatagon ug ang padayong hulga nga giatubang sa Panguil Bay mao untay mohiusa sa katawhan dinhi ug dili ang papel gikan sa Palasyo.
No comments:
Post a Comment