Ginikanan ug anak

Kitang mga ginikanan mahimuot gyod nga magsud-ong sa paglambo nga giabot sa atong mga anak. Sa gagmay pa kaayo sila, malingaw kitang makadungog sa ilang kinataw-an, sa ilang paningkamot nga molakaw, sa ilang paningkamot og litok sa mga unang pulong, ug daghan pa.

Sa paglanat sa panahon, daghan sila og mga madiskobrehan. Ug sa matag pagdiskobre, mohatod kini kanila sa lain pang mga pangotana nga nagtagad sa lain pa gyong mga pangotana human sa matag tubag nga ilang makaplagan. Ingon ini gyod kuno ang normal nga kalibutan sa mga bata matud sa akong maestro kaniadto sa Psychology 1.

Busa angayan lang gyod nga anaa silay kasandigan panahon sa ilang mga panginahanglan sama sa tubag sa ilang mga pangotana, pagpatin-aw sa ilang mga kalibog, —ug labaw sa tanan sa pag-amoma nga ilang gikinahanglan. Kining tanan, matud sa akong maestro, mao ang modetermina sa ilang pag-ila sa ilang kaugalingon, sa mga tawo ug sa mga butang sa ilang palibot. Ang kapakyas kuno sa mga ginikanan nga ihatag kining tanan, mao kuno ang hinungdan sa problemadong pagtubo sa mga kabataan.

Busa wala gyod tingale ginikanan nga wala mangandoy nga makahatag sa ilang pinakamaayo alang sa ilang anak. Apan sama sa kadaghanang ginikanan, ako makadaghan na usab nga nabutang sa dili siguradong posisyon diha sa akong paningkamot pagtagbaw sa mga pangutana sa akong mga anak. Kamo, aduna pod siguroy mga susamang kasinatian.

Sa akong bahin, kini ang mga sitwasyon nga nabutang ako sa alang-alang nga lugar uban sa akong 4-year old nga anak:

On Theology

Anak: Tay, kinsa ang tatay ni Jesus?
Tatay: God the father.
Anak: Kinsay ngalan?
Tatay: Mao ra na iya ngalan.
Anak: Diba duna toy ngalan ang tatay ni Jesus? Ikaw baya ang misulti nako kinsa to iya tatay sa una…(Iyang giutingkay kadtong picture sa kalendaryo sa Holy Family nga anaa si Joseph Mary and Baby Jesus.)
Tatay: (Nakahinomdom) Ahhh. Si Joseph..pero dili siya ang tinuod tatay ni Jesus.
Anak: Dili ba bana siya ni Mama Mary?
Tatay: O pero….
Anak: (Misal-ot sa tunga-tunga sa sa akong kalibog) Duha diay bana ni Mama Mary…?

Wala ko makatingog ug mibalhin na pod siya og laing hisgutanan.

(Hangtud sa sunod: On Logic)